西貢萬宜水庫東壩附近有浪茄、破邊洲、六角柱石，一向是郊遊熱門地點，但因位置偏遠且交通不便，同樣也是的士「劏客」 （坐地起價）理想地點。東壩距離最近的巴士站鯽魚湖站約 9 公里，距離北潭涌巴士站接近 10 公里。由東壩返回西貢市中心西貢碼頭接近 18 公里距離，與屯門公路差不多，按新界的士的車資約為 125 元。

雖然早在 2018 年運輸署已找來承辦商開設 9A 專線小巴來往北潭涌至東壩，方便郊遊人士，可是營業時間太短，只於星期日及公眾假期下午 3:20 - 7:00 行走 （東壩開出），班次也疏落，才 20 分鐘一班車。近來是郊遊旺季，難以滿足需求。如果郊遊人士選擇從東壩離開，要麼選擇步行，否則只有選擇的士，使得的士有很多「劏客」的空間，可以是即場按人頭坐地起價 ( 泥鯭的 )，如遊人電召的士，要講明加上小費才有的士願意前往接載。郊遊人士對此等「劏客」行為也大感無奈。

不過，2021 年 1 月 1 日 東壩卻上演了大快人心的一幕。興華茶餐廳 老闆阿鎽除夕當日與友人露營，元旦日離開，大約在 下午 6:30 到東壩排隊等候的士。當時是人潮的高峰期，排隊人龍接近 50 人。阿鎽在自己餐廳的專頁憶述這次難忘情景：

// 排隊期間，聽到有不少司機大嗌「$100一位返西貢市中心」原價一架車大約 $120 左右，咁其實我都明白嘅，司機見到咁多人，都實劏你㗎喇 ~

但係估唔到呢個時候，排緊隊嘅香港人竟然團結起嚟話一齊唔搭呢啲人血的士！有唔少人大嗌唔係跟錶價錢嘅的士唔會搭，氣勢甚好，其實啲司機最初唔會理，繼續大嗌「$100一位快啲上車啦，架架都一樣㗎」但係點估到真係冇人上車，而換來嘅係好多人一齊鬧佢，最後唔少人血的士比人鬧到空車而回離開！有收正價嘅的士司機更較低車窗讚做得好！

 // 而我好記得有一架人血的士本來喺度嗌緊「$100一位」，但見冇人上車，最後死死地氣話「跟錶正價都得喇，快啲上車啦」，但係估唔到嘅係佢跪低都好，好多人依然係大叫「走啦，冇人想搭你車呀 ! 」最後都係冇人上佢車，冇客咁走咗，大家寧願繼續排隊等一啲正常嘅的士都唔搭佢車，果下真係有一種打從心裡莫名嘅開心！

 // 其實天氣咁凍，我相信大家玩完辛辛苦苦出到嚟都想快啲上到車離開！見到條隊咁長，我相信一定有人會唔介意比貴少少錢快啲返到屋企，但係呢件事上面我見到嘅係大家寧願犧牲時間同耐性都唔想再畀人撳住搶！亦唔想縱容呢啲人血的士，對一啲正常嘅的士唔公平！

// 經過咗 2019、2020 年之後，無論係習慣上或者對待每一件小事上面！我相信好多香港人都真係有咗好大嘅改變！雖然呢兩年嚟都係非常負面，但呢樣係我喺呢兩年嚟其中一樣覺得好欣慰嘅事。

// 呢件小事其實就好似反映緊成個香港咁，大家一直以嚟好多事都係不斷啞忍，都係逆來順受。而呢件事上面就好似香港人呢一兩年咁樣，終於學識咗一樣野，呢樣野叫做「反抗」！喺今次等的士事件上，其實事源就係因為有人會嗌「咁貴，一齊唔好搭佢地啦」，只要一日冇呢個人，大家都唔會有改變，有人開始就會有人跟！希望大家都可以多啲做行第一步嘅呢個人，生活先會有多啲嘅改變！

最後阿鎽寄語大家「踏入 2021 年，希望各位香港人喺各自嘅位置上面繼續努力！堅持信念！勿忘初心！希望大家最後可以做到好似呢件事上面咁樣，團結就是力量，唔好畀人撳住嚟搶，希望最後個結果都係邪不能勝正！ 」